立即註冊 登錄
粵曲交流網 返回首頁

方外人的微博 http://www.sueopera.com/bbs/?24

日誌

<男燒衣> 楊超然

熱度 7已有 832 次閱讀2015-6-30 05:19 |個人分類:回響篇|系統分類:廣播室迴響

多謝 楊超然兄分享一首極少曲友選唱的南音曲目,男燒衣. 楊兄唱得自然流暢,很是好聽.值得一讚.

楊兄此外更分享曲詞註釋,以下乃轉載自 楊兄之貼文, 與各曲友分享.


憑著曲文,可多少窺見晚清時既風俗。照推算,應該是時人寫風月之事。憑此,可當作一手史料,了解晚清時民間生活的一部分。
曲文提到:

1) 埋街:花艇上的妓女,從良後便不再在艇上侍客,故稱:「埋街」或「上岸」。

2) 杭州的被鋪、蚊帳:說明睡房內的布織物,以杭州出產者為首選。

3) 香珠一串十八子:在清代,用十八粒香木或沉香、瑪瑙等等的珠子,串成的手串,又稱十八子。佩帶十八子的風俗源出唸佛,十八子即象徵佛教的十八界:即六根、六塵、和六識,合共十八界。
聽過有人說「香珠一串十八子」是頸鏈,應是錯解。清代的頸鏈珠串,朝野分明。朝庭各品官員佩戴珠串,有嚴格規訂,不可亂用。平民更不可佩用朝珠。

4) 刨花:即刨花油。作料是採用造香木家俬時,刨下的木皮,用水泡出樹脂,成刨花油。婦女用以塗抹於秀髮上,以增添香氣和光澤。此物以前在上海街仍可買到的。

5) 輭抆:是舊時婦女以綿線拔除汗毛用的東西,現今已復興,並愈趨流行。

6) 雷州斗:信是當時出產的煙斗,以雷州品質為最佳。

7) 煙屎勾:吸罷鴉片,用此物清理煙斗內的煙屎。把煙屎儲下來仍可供吸不起一手煙的人吸用。此等又窮又大鋪癮者曰:煙屎佬。(黃德輔兄在之前已詳細解釋過,讀者有興趣可翻查 黃德輔兄在「三隻雀仔日誌中找到。)

8) 焗砂:應是玻璃燈盞,除照明外,更用以燒紅已手揉成粒狀的鴉片煙膏。負責此工作者叫:打苛,除此之外,斟茶遞水、遞痰罐、削生果給恩容煙後潤喉等等服務。

9) 舊公煙:鴉片煙在清代曾經由公家經營。在香港,也在1880年代由港英政府發售,故稱公煙。舊公煙即是指英國透過在印度成立的東印度公司,輸入生鴉片至廣州,繼在廣州,煮練成煙膏,呈深褐色狀,又稱舊煙膏。

10) 芽蘭帶:應是婦女扎腳用的纏布帶。有說品質最佳者,由愛爾蘭(Ireland) 輸入,故稱「芽蘭」帶。此說未知是否屬實?

11) 艇嫂:清一代,在廣州的風月場所,有集中於荔枝灣畔,花艇雲集。各省籍妓女,各自自成一角。尋歡者乘艇瀏覽一番,選定喜好,方纔登花艇。此舉又稱「打水圍」。描寫清代荔灣風月至生動深刻者,莫如:沈弼(亦即:沈三白)。沈弼於【浮生六記】中之「浪遊記快」,便有作第一身的描述,對清一代在廣州的風月場所,提供了很寶貴的第一手史料。曲文中提到的「艇嫂」,應為生意招徠的鴇母。


(多謝 楊兄分享. 小弟借用 楊兄之貼文, 望 楊兄勿見怪. )



感動

喜歡
1

鮮花
2

握手
4

拍掌

剛表態過的朋友 (7 人)

發表評論 評論 (16 個評論)

回覆 黃德輔 2015-6-30 14:56
方外人;方會長在(南燒衣) 一曲播出時及時擔任解畫員,給喜歡此曲的網友意外的驚喜,否則很多曲中出現的詞句,相信大家都唔知講緊乜! 方會長的講解至為詳盡!  給[南燒衣]此曲錦上添花!  值得大力鼓掌。       
回覆 楊超然 2015-7-1 01:26
非常感謝  方外人前輩對晚支持鼓勵,不嫌晚對曲文中之舊有名詞粗疏註解外,更另闢日誌,專題探討。晚對  前輩仗義協助之舉,實不知如何報答?感恩不盡!     

查晚對「男燒衣」內,提到之舊有詞彙,未有作正式深入考證,若有誤解紕漏,過錯全在晚,責任亦在晚,與  方外人前輩無關。特此聲明!

晚亦祈有識之士,能不吝指正,並賜教更詳盡深入資料,使故有名辭典故,得以保育及活化,功德無量!     

附貼:白駒榮唱版之「男燒衣」曲文,供各曲友參考及欣賞。

男燒衣

(正線南音)

聞得妹你話死﹐我實在見悲傷﹐妹呀你為因何事,攪到自縊懸樑﹐人話死咯,尚屬思疑﹐我唔信佢講﹐今日你果然係死左咯﹐叫我怎不悲傷!唉呢回唔望呀,係與嬌彈共唱﹐唔望燈前月下呢,共你結呢段鸞鳳。呢回任得天上,係跌一個落黎﹐唔慌我重想﹐唉!愁有萬丈!不若把隻小舟,將水陸放!等你早登仙界,直向慈航。

(畧爽)
忙解纜﹐出到江濱。祇見江楓漁火,照住我愁人。各物擺齊兼共果品﹐我願妹前來,去鑒領我誠心。
(轉乙反)
燒頁紙錢珠淚惡忍﹐三杯薄酒呢,我奠妹孤魂……. 呀魂。

(過序)
燒到童男童女,等妹相親近。吩咐眾人使喚,要聽佢嘅酹斟。大「能 」(音:「能」,陰去聲,即第三聲) 咯鎖匙,交過你收緊﹐你切呀莫頑皮,激著主人。燒到胭脂和水粉﹐刨花兼軟抆﹐簡妝一個呢,照妹孤魂……. 呀魂。

(過序)
燒到芽蘭帶﹐與共繡花鞋﹐可恨當初唔好,早日帶妹埋街﹐免使呀妳在青樓,多苦捱﹐咁好呢沉香,當作爛柴。呢條芽蘭帶,乃係小生呢親手買!可惜對花鞋,繡得咁佳!記得八月中秋,同把月拜﹐重話二人衾枕永結和諧。點想別離,你心事古怪﹐誰知錯意把妹命來晒﹐唉越思越想心痛壞﹐珠淚流唔晒﹐妹呀你便夢中魂魄共我講幾句情懷…. 呀懷。

(過序)
燒到被鋪蚊帳咯,係出在杭州﹐仲有香珠一串十八子搭在妹嘅襟頭。燒到煙槍、煙托,與及雷州斗﹐我又嚟燒到呢個煙屎勾。局砂呢一盞,光明透﹐但凡燈暗,妹呀你自己添油。呢盒公煙呢原本係舊咯﹐佢馨香翳膩,都解得下煩憂﹐妳無事拈來,燂佢幾口﹐不防陰府呢,妳自己籌謀……呀謀!

(過序)
咁多物件燒來,交過你手﹐至緊關防門戶咯,莫俾人愉!

(轉正線南音)
妹妳生前所用,般般都有喇!今日把火焚燒在水面浮。我再酌酒﹐奠妹妝台﹐願妹呀妳前來,鑑領我一杯﹐等妳飲過呀此杯呢離了苦海﹐咁就早登仙界,直上蓬萊。又到艇嫂佢上前,同佢抹淚﹐我叫聲呀大相呀!你切莫咁悲哀﹐捨得多情愁無,多情配!唉!奴奴情願,共你為媒。

(畧慢)
你既有呀真心寧守耐﹐等我找尋一個呢,仲靚過花魁!人話男人心腸,係多變改唧!但我見君情義,真正少人陪!臘燭替君流血淚﹐半天仙鶴,渡郎追﹐你不如忍淚,就埋街去﹐咁就遠離今夜啦,你自己痴呆!

(催快)
我忙轉艇﹐就快如雲﹐嚟啦!雙槳齊撓,在水面奔!海闊呀!風狂,你須要坐穩囉﹐等我行埋共你,講幾句時聞。我地隔鄰呀!有個叫做馮人引﹐真正好品!腳又細時,滿手黹針呀。年方二八,知書禮啦﹐詩詞歌賦,佢樣樣皆能!舊時呀有位少爺,話同佢上岸﹐佢要揀個多情人仔,至兩相登。我問聲呀大相,可否心情允?真正妙甚咯!真!妙甚咯!等我把鵲橋,高駕起咯!等你直上到浮雲…..。
                                
                                    (全曲完)
回覆 方外人 2015-7-1 04:19
黃德輔: 方外人;方會長在(南燒衣) 一曲播出時及時擔任解畫員,給喜歡此曲的網友意外的驚喜,否則很多曲中出現的詞句,相信大家都唔知講緊乜! 方會長的講解至為詳盡!  給 ...
多謝黃兄支持.
小弟正是此意.因而貼上 楊兄之註釋, 供諸同好, 方便欣賞此曲.
回覆 方外人 2015-7-1 04:32
楊超然: 非常感謝  方外人前輩對晚支持鼓勵,不嫌晚對曲文中之舊有名詞粗疏註解外,更另闢日誌,專題探討。晚對  前輩仗義協助之舉,實不知如何報答?感恩不盡!     ...
此曲難度甚高, 楊兄唱得很好聽哩.   
非常多謝 楊兄沒有見怪.
這樣吧, 如有錯漏, 歡迎向本[好食懶飛會]投訴, 本會長一定假公正處理.
回覆 方外人 2015-7-1 04:34
多謝 李仲雯曲友表態支持!
回覆 楊超然 2015-7-1 08:41
方外人: 此曲難度甚高, 楊兄唱得很好聽哩.   
非常多謝 楊兄沒有見怪.
這樣吧, 如有錯漏, 歡迎向本[好食懶飛會]投訴, 本會長一定假公正處理.
  ...
            
喜聞  方會長有此英明定奪。係咁就一天都光晒咯!晚又大可胡言亂語一番哩!
最好揾埋龍兒在旁敲鑼打鼓唱龍舟,紫米露露斟茶遞水!當然唔少得皇妹Big 餡,侍奉身旁「打荷」,邊唱木魚書邊燂煙卜。晚嘛....側臥酸枝貴妃椅上,「燂佢幾口」!真係high到似「登仙界,直上到蓬萊」!     
回覆 金燕子 2015-7-1 13:38
   報告方会长,加料,
皇兄话佢中意呢支歌仔
【係因為佢夠老古董,夠懷舊,內中描寫的事物,大都已絕跡,皇弟每聽白駒榮唱此曲,便不其然發思古幽情】,
回覆 金燕子 2015-7-1 13:44
楊超然:                
最好揾埋龍兒在旁敲鑼打鼓唱龍舟,紫米露露斟茶遞水!當然唔少得皇妹Big 餡,侍奉身旁「打荷」,邊唱木魚書邊燂煙卜。晚嘛....側臥酸枝貴妃椅上,「燂佢幾口」!真係high到似「登仙界,直上到蓬萊」 ...

皇兄果然【不其然發思古幽情】播,
    
(白日梦)
回覆 Annie 2015-7-1 22:48
多謝方會長及楊超然曲友分享! 小妹又多增知識, 多謝!  
回覆 Annie 2015-7-1 23:38
方外人: 此曲難度甚高, 楊兄唱得很好聽哩.   
非常多謝 楊兄沒有見怪.
這樣吧, 如有錯漏, 歡迎向本[好食懶飛會]投訴, 本會長一定假公正處理.
  ...
      
回覆 楊超然 2015-7-1 23:54
金燕子:   
皇兄果然【不其然發思古幽情】播,
       
(白日梦)
      
係呀!係呀!皇姐呀!發呆發白日夢呢家嘢,從來就係皇弟既強項泥㗎!
回覆 楊超然 2015-7-1 23:56
Annie: 多謝方會長及楊超然曲友分享! 小妹又多增知識, 多謝!   
Annie 學姐勿客氣!學弟都係估估下,唔知啱定錯,不能盡信。
回覆 方外人 2015-7-4 04:54
楊超然:               
喜聞  方會長有此英明定奪。係咁就一天都光晒咯!晚又大可胡言亂語一番哩!
最好揾埋龍兒在旁敲鑼 ...
紫米露露小家碧玉,斟茶遞水甚是討好.
只是嘛   令皇妹Big餡做打荷, fing來fing去唱木魚書,燂煙卜速度快過流水 ,只怕小弟high到早登仙界,直上蓬萊矣.
       
回覆 方外人 2015-7-4 04:57
金燕子:    報告方会长,加料,
皇兄话佢中意呢支歌仔
【係因為佢夠老古董,夠懷舊,內中描寫的事物,大都已絕跡,皇弟每聽白駒榮唱此曲,便不其然發思古幽情 ...
多謝 燕子曲友加料支持!  
回覆 方外人 2015-7-4 04:58
金燕子:   
皇兄果然【不其然發思古幽情】播,
     
(白日梦)
白日夢的新定義?   
回覆 楊超然 2015-7-4 05:49
方外人: 紫米露露小家碧玉,斟茶遞水甚是討好.
只是嘛     令皇妹Big餡做打荷, fing來fing去唱木魚書,燂煙卜速度快過流水 ,只怕小弟high到早登仙界,直 ...
       
會長即係會長,凡事想得週到,可謂懶得起之人!蓋有能者舉一步,猶勝別人走十步,故可懶足九步矣!        
又係播,皇妹Big餡成日起勢 fing,揾拒打荷,實聽打瀉籮蟹項喇!不如考慮下啊「碗沙」隱陣D,佢係老咗少少,腰又彎時手又震,燂起煙卜泥有多少論盡,但係騰騰震好過腰fing fing,至少唔會「拍針」咁快,搞到提早上仙界,把自已條命泥晒,諗落都係寧慢毋快,反正效果都一樣咁high!

facelist

您需要登錄後才可以評論 登錄 | 立即註冊

粵曲交流網 ( 版權所有,不得轉載 )

GMT+8, 2018-9-25 04:10

Powered by sueopera.com

© 2001-2017 Comsenz Inc.

回頂部